O Consello da Xunta de Galicia aprobou de forma provisional o proxecto de mellora da estrada OU-212, no seu percorrido polo treito interurbano do Concello de Beariz, e na travesía de Liñares, no municipio de Avión.
Esta actuación conta cun investimento estimado en máis de 1,3 millóns de euros e correspóndese coa 1ª fase en algo máis de 6 quilómetros, entre o centro urbano de Beariz e o desvío ao núcleo do Couso. No seu conxunto, a intervención suporá un investimento total de 3,85 millóns de euros.
Nesta 1ª fase, as obras de mellora da estrada no treito interurbano de Beariz consistirán na rectificación dunha curva e a mellora do firme; mentres que en Avión, os traballos centraranse na travesía de Liñares, que se dotará de beirarrúas e aparcamento. A actuación incluirá o acondicionamento dos accesos existentes, renovación da iluminación e das varandas de protección e sinalización.
