Todas as persoas que, cos seus disfraces e carrozas, desexen participar nos dous desfiles que se celebrarán na vila de Verín con motivo do Entroido deberán inscribirse previamente na Oficina de Información Turística do municipio en horario de mañá -de 10,00 horas a 14,00 horas- ou de tarde -de 16,30 horas a 20,00 horas-.
A data límite para facelo será o vindeiro mércores, día 19 de febreiro, ás 14,00 horas. Ese mesmo día, a partir das 20,00 horas, celebrarase unha reunión por parte da organización durante a que se decidirá, ao seu criterio, a orde do desfile do que se realizarán dous pases. Un deles terá lugar o vindeiro domingo, día 23 de febreiro e, o segundo, será o martes de Entroido -25 de febreiro-. A saída do domingo producirase ás 12,00 horas e a do martes ás 16,30 horas.
Dende o Concello de Verín puntualizaron que as comparsas ou carrozas que participen no desfile deberán estar, como mínimo, 30 minutos antes da saída para que a Organización poida colocalos na súa posición. O punto será a avenida de Castela, á altura da rúa San Félix.
Aquelas carrozas que queiran abandonar o percorrido antes de chegar á Praza da Alameda unicamente poderán facelo a través da ponte da n-525 chegando ata a Rotonda da Casa do escudo se queren dar a volta, e quedándose unicamente no carril dereito agardando a que o desfile remate para ir ao seu destino. É "importante" que deixen sempre un carril libre.
