As Isolinas, as irmás que durante máis de 50 anos conquistaron cos seus “bolos” os padais dos celanoveses co seu obradoiro da rúa Botica, serán unhas das protagonistas da romaría entográfica Raigame que o 17 de maio celebrarase en Vilanova dos Infantes e que estará dedicado aos “dulceiros” da provincia de Ourense, os actuais e os pasados.
O presidente da Deputación, Luis Menor, e o alcalde de Celanova, Antonio Puga, como institucións organizadoras do evento, daban a coñecer onte, conxuntamente con Xavier Álvarez, do Centro de Cultura Popular Xaquín Lorenzo, as novidades da edición número 21, que reunirá a 120 artesáns e varios centos de músicos e danzantes de 23 agrupacións de Ourense, Pontevedra, Lugo e Portugal na “romaría por excelencia da nosa provincia e unha das máis especiais e singulares nesta data na nosa comunidade”, dixo Menor, describindo a celebración con “un tesouro da nosa provincia que temos que mimar”.
De 11,00 a 19,00 horas as rúas e prazas do burgo medieval converteranse nun fervedoiro de artesáns e grupos que acoden para dar mostra da riqueza da cultura tradicional galega. “Cada ano temos máis peticións para poñer un posto en Raigame, sentimos e queremos transmitir as nosas desculpas porque non podemos atender todas as peticións porque o espazo no burgo é o que é”, dixo, convidando a que “nesta ponte festiva veñan todos a desfrutala a Vilanova”.
Entre as novidades desta edición destacan as visitas guiadas relacionadas co oficio dos canteiros que realizará a asociación “ViaxaMos no Tempo” para coñecer “as marcas na torre, a heráldica, as casas grandes, os muros…”, enumeraba Xavier Álvarez, do Centro da Cultura Popular. Tamén se celebrará un concurso de tartas para o público en xeral, ademais dos xa tradicionais obradoiros infantís, concursos de fotografía, microvideo e decoración de fachadas, e o servizo de transporte entre Celanova e Vilanova con dous autobuses históricos.
Apoio e colaboración
Unha alborada polas rúas inaugurará a romaría que conta con varias citas de interese como a misa cantada ás 11,30 horas pola Coral de Ruada, a entrega do premio honorífico Adolfo Enríquez que recollerá Concepción Fernández ás 13,30 horas e, ao terminar, a actuación dos Danzantes de Vilanova dos Infantes. O Grupo Castro Floxo clausurará a xornada ás 18,30 horas. Tanto Menor como Puga quixeron facer un recoñecemento público aos veciños de Vilanova dos Infantes, pola súa implicación coa romaría, e ao apoio da Axencia de Turismo de Galicia, a Abanca, ao Museo Entolóxico de Rivadavia, á Coral de Ruada e ao traballo desenvolvido desde o Centro de Cultura Popular “e o compromiso da Deputación, tamén do persoal de obras e de recursos humanos”, dixo o alcalde celanovés.