A ronda de fulións abre o Entroido en Manzaneda

A corna, xunto coas chocas das Mázcaras e o forte retumbar dos bombos, gadañas e aixadas do Fulión da Mourela, soaban con forza nas rúas da aldea de Palleirós, na primeira noite do Entroido en Manzaneda.

O comezo do evento viña marcado pola tradicional petición de permiso en verso do fulión visitante, que era recibido polas Mázcaras e os veciños da aldea na entrada da localidade na noite do 31 de xaneiro. A resposta en verso da xente de Palleirós daba paso á celebración, facendo que o fulión tomase vida e se lanzase nunha longa andaina, coas paradas en cada casa e adegas nas que se repoñían forzas.

Un momento para a confraternización, no cal a veciñanza de Palleirós ofreceu bebidas, doces e outros manxares para agasallar aos visitantes. Así arrincaba o Entroido tradicional nas terras de Manzaneda.