Antonio Piñeiro: “Relato as historias de ourensáns porque ser ourensán é un orgullo”

Leva sendo funcionario do Concello de Celanova dende o ano 1987 e agora ocupa a praza de encargado de Asuntos Culturais. Ademais, é coñecido polas súas colaboración en La Región dende 1985. De feito, recolleu historias de ourensáns nas súas columnas semanais para “rescatar a nosa historia” e “coñecer a idiosincrasia cultural” da provincia para que non “quede no esquecemento”. Para celebrar que xa hai cen historias contadas, o autor publicou un libro recompilatorio chamado “Ourense: crónicas de agora e sempre”. Como xorde a idea deste libro? Sempre quixen realizar proxectos deste tipo dende que dirixín a Revista Auria. Era unha publicación moi agradecida, a color, gráfica e con bos contidos, que se repartía mensualmente. Dende aquel momento sempre fun coleccionando ourensáns. Cando xa tiña un arquivo grande, quixen facer semanalmente unhas crónicas xornalísticas. Estas consisten en relatar unha historia que acompañe a actualidade. O que quería amosar con isto son as historias de agora e sempre. O que se acaba ilustrando co proxecto é un mosaico riquísimo de ourensáns polo mundo que responden a uns perfís cunhas características que nos definen como ourensáns. Exemplos disto son o saber adaptarse nos lugares nos que se reside, estar no momento e lugar indicados, o respecto pola terra e o non esquecemento ás raíces ou o amor á familia. Cada historia dáme ganas de seguir a facer máis, pero isto, coma todo, ten unha data de caducidade e o meu propósito é chegar ás 200 historias. Cando comezou esta idea? Cando rematou a revista Auria, empecei a coleccionar historias curiosas. Alí onde aparecía a palabra Ourense, gardaba a historia. Se aparecía unha persoa cunha actividade curiosa e que, por exemplo, naceu na provincia, gardaba esa historia. Dende ese momento xa levo 150 semanas onde a saúde e o tempo me permitiron realizar este proxecto. A actualidade, ou algún aspecto dela, márcame a forma de xogar coa personaxe que ilustrar, dentro da carteira de personaxes que posúo. Aínda que algúns apareceron polo azar da vida. Quero destacar que este proxecto non sería posible sen as facilidades que hoxe en día hai en internet, como a Galiciana e a hemeroteca de La Región. A xente non comprende o valor que ten. Nela está relatada a vida da provincia día a día. Podes seguir a vida dun personaxe a través dos anos. Hai algunha historia á que lle teña especial cariño? Si, a do paleontólogo Castor Cartelle. Era fillo dun comisario de policía. Naceu en Padrenda e eu descubrín a súa historia cando estaba buscando algo de Cartelle. Deixeime levar. Esta historia está entre as 100 primeiras. A vida lévate por camiños inescrutables. De todo o que eu recollo, céntrome nun aspecto concreto das súas vidas que logo moita xente, ao ler a crónica, dime que os conduce a buscar máis en internet sobre eles. Cre que este formato pode conectar coas novas xeracións? O que teño eu detectado é que a xente está farta da sobreinformación que nos chega dende as redes e o teléfono. A xente ten ganas de coñecer historias humanas, que son a esencia do xornalismo. Estase a perder esa humanidade no xornalismo? Si. Eu empecei con isto hai tres anos e vexo que á xente lle gusta conectar con esa parte máis humana, conectar con ese Ourense descoñecido. Antes, a xente tiña unha vida moi rica e iso transcende nestas historias. Ten algunha expectativa despois deste proxecto? A este proxecto quédalle un ano. E logo estou pensando noutra idea, que sería unha derivada coas hemerotecas: coller unha historia e realizar un relato a través diso. Que lle achegan as historias? Orgullo de ser de Ourense. As historias achegáronme unha intrahistoria que achega esas características únicas que temos os da provincia. Tamén me reporta moita satisfacción achegar datos dunha persoa ás súas familias. De todo o que teño escrito, tráenme de volta satisfacción e agradecemento. O libro pódese atopar en calquera libraría. Está intimamente relacionado con La Región e queremos facer un acto para presentalo ou quizais un Foro.