O grupo Aerolab do Campus de Ourense creará unha ferramenta computacional para definir as mellores rutas para os aeroportos de drons combinando datos xeoespaciais, meteorolóxicos e de simulación de fluídos.
O grupo traballa, no marco dun proxecto estatal, na creación desta ferramenta computacional dentro dun proxecto titulado “Mobilidade aérea urbana segura e eficiente en vertiportos baseada en modelos CFD de micrometeoroloxía”.
Ten unha duración de dous anos, estando previsto que remate en decembro de 2025. Está financiado con 121.000 euros por Proxectos de Xeración de Coñecemento, do Ministerio de Ciencia e Innovación, e o Fondo Europeo de Desenvolvemento Rexional-Next Generation.
Como investigadores principais están os catedráticos e membros do Instituto de Física e Ciencias Aeroespaciais da UVigo Elena Martín e Higinio González. O enfoque do proxecto é multidisciplinar, combinando persoal investigador con experiencia en sistemas aéreos non tripulados e tecnoloxía xeoespacial (Higinio González, Iván Puente e Luis Miguel González), en modelos meteorolóxicos (Nieves Lorenzo e Inés Álvarez) e aerodinámica, mecánica de fluídos computacional e modelado de orde reducida (Elena Martín).
