Ata 77 especialistas de 21 países participan no duodécimo “Taller internacional sobre cambios e tendencias a longo prazo na atmosfera”, que comezou o luns e finaliza hoxe no Campus de Ourense. Ben de xeito presencial ou virtual, asisten expertos de 51 institucións, algunhas da talla da NASA, o Instituto de Tecnoloxía de Massachusetts (MIT) ou as academias de ciencias de China ou India.
Juan Antonio Añel, físico da UVigo que coordina o evento, explica que se trata do foro “de referencia para as persoas e institucións que estudamos a alta atmosfera”. É a primeira vez que este encontro, programado cada dous anos, ten lugar en España. No encontro abórdanse, nun contexto de cambio climático, as variacións e tendencias a longo prazo nas atmosferas media e alta. Máis en concreto, trátanse -entre outros- os cambios e as tendencias na ionosfera e a termosfera; os mecanismos dinámicos, físicos, químicos, solares e radiactivos de variacións, e os vencellos das tendencias coa navegación por satélite e o lixo espacial.