Este ano escolar, o alumnado do IES Xermán Ancochea Quevedo seguía un interesante proxecto acompañados da súa profesora de Lingua Galega, Íria Fernández Moscoso. O grupo de mozos emprendeu unha misión crucial para o futuro da súa cultura e lingua.
“A intención é que teña continuidade o ano que vén” afirma a súa profesora de Lingua Galega, Íria Fernández
Este proxecto, impulsado polo Departamento de Lingua e Literatura Galegas, non só buscaba salvagardar as palabras en risco de desaparecer, senón tamén conectar ao alumnado coa súa contorna máis próxima. Ao explorar o léxico patrimonial dos concellos de Manzaneda, Castro Caldelas, San Xoán de Río, Chandrexa de Queixa e A Pobra de Trives, de onde son a maior parte dos estudantes do centro, os mozos aprenderon a valorar e respectar o seu patrimonio cultural. A súa profesora, quen guiou o proxecto en todo momento, valoraba moi positivamente que a través desta actividade fomentouse o uso do galego e a inmersión na comunidade, estreitando os lazos entre o alumnado e a súa veciñanza.
Este importante traballo de compilación fixo que o Instituto da Lingua Galega (ILG) incorporara léxico da contorna de Trives ao corpus do “Tesouro da lingua galega e portuguesa”.
Deste xeito, palabras como rendar (sachar a viña para quitarlle as herbas), acarúo (esquina da horta onde non chega o arado e a teñen que traballar a man) ou teta (peza de tripa que se deixa entre os chourizos) quedaran refrexadas nesta incorporación do léxico da contorna das terras de Trives, intentando evitar que caian no esquecemento e rematen desaparecendo.
Froito deste traballo é unha valiosa base de datos cunhas 200 palabras, accesible nesta ligazón: https://docs.google.com/spreadsheets/d/1KfOnkWuDYc49NkTfEqk5sMeqMmW2rbfseHghKFGdWQw/edit?usp=sharing.
A profesora de lingua galega do instituto, Fernández Moscoso, que foi guía fundamental neste proxecto, agarda que este sexa só o comezo dun longo camiño. O seu desexo é que cada unha das palabras recollidas sexa posta en valor e se utilice, procurando así que o rico léxico da comarca non caia no esquecemento e siga sendo parte viva e esencial da identidade galega, e ao mesmo tempo que cada ano se sigan sumando palabras a esta base de datos, facendo que alumnos da ESO e de Bacharelato indaguen no seu día a día, sendo coñecedores das palabras propias do lugar.
