Volve o Festival Literario de Allariz (FLAZ) para consolidar un espazo de encontro entre a comunidade lectora. Os días 5 e 6 de xullo, estarán presentes os autores Antón Riveiro Coello, Carlos Meixide, Marta Orriols e Berta Dávila, e os axentes literarios Marina Penalva e Bernat Fiol.
O venres 5 xullo comezan as actividades, ás 17,00 horas, co roteiro polo casco histórico de Allariz da man de Xeitura Turismo Cultural, na Praza do Matadoiro. A continuación, ás 19,30 horas, “Memoria e historia na novela”, un diálogo entre Antón Riveiro Coello e Carlos Meixide, na Sala de Exposicións A Fábrica.
O día seguinte, de 11,00 horas a 21,00 horas, terá lugar a Feira de Editoras Galegas, no Paseo da Alameda, onde participan Antela, Cuarto de Inverno, Patasdepeixe, Boadicea, Los Libros del Salvaje, Rinoceronte, Rodolfo e Priscila e Aira Editorial. Despois, ás 12,00 horas, será o turno de “Todo o que quixo saber sobre os axentes literarios e nunca se atreveu a preguntar”. Un diálogo entre Marina Penalva e Bernat Fiol, na Sala de Exposicións A Fábrica.
Para continuar, ás 17,30 horas, “A vida cotiá como materia prima na literatura actual”. Un diálogo entre Marta Orriols e Berta Dávila, na Sala de Exposicións A Fábrica. Para rematar o FLAZ, ás 19,30 horas, “Escribir e publicar non son a mesma cousa”. Unha mesa redonda con todos os convidados: Antón Riveiro Coello, Carlos Meixide, Marina Penalva, Bernat Fiol, Marta Orriols e Berta Dávila, na Sala de Exposicións A Fábrica.
